Proyeición "Three Rooms of Melancholia"

Esti prósimu miércoles, 17 d’avientu, última proyeición del añu nel CS Sestaferia. Pa cerrar la temporada, vamos proyectar, a partir de les 7 la tarde y con entrada llibre y de baldre, “Three Rooms of Melancholia”, del que vos axuntamos un pequeñu comentariu.

Three Rooms of Melancholia
Esti documental de la filandesa Pirjo Honsakalo muestra tola devastación que se desencadena en tornu al conflictu de Chechenia. El documental divídese en tres “estancies” y toes elles tienen como protagonistes a neños.
El primer episodiu –“añorar”- ye la crónica de la vida diaria na academia militar de Kronstadt, cerca de San Petesburgu. Anque a dicir verdá, paez un orfanatu más qu’otra cosa. Les breves intervenciones de la voz n’off mencionen los nomes, edá y antecedentes de familiares los pequeños soldaos. La mayoría proceden de families desestructuraes: padres alcohólicos, maltratadores, indixentes… o cenciellamente ensin tiempu pa cuidar de los sus fíos. Na rutina de l’academia los neños algamaron cierta estabilidá, pero nun hai qu’escaecer que tán siendo entrenaos pa combatir nuna guerra interminable.
Lo cual nos lleva a Grozni, capital de la república de Chechenia. Na segunda estancia –“alendar”-, rodada en blancu y negru pero menos conmovedora que la primera, una muyer dedícase a recoyer a neños de los edificios en ruines. Nesta ocasión trátase de tres pequeños que nun pueden ser atendíos pola su má, gravemente enferma.
L’últimu episodiu títulase “recordar”. El campu de refuxaos d’Ingushetia nos deja ver cómo se vive el conflictu al otru lláu de la frontera. De nuevu, como na primer parte, los güérfanos son los protagonistes d’esta hestoria.